وظيفة المدون .. ستة اسرار لا تعرفها عني

71

نبدء مع الشكر على التوريطة من ريم ، بس من التوريطات الحلوة بعالم التدوين .

صراحة وصلني الواجب قبل الكتير من المدونين لكن كنت محتار بين شو هنن الاسرار الستة اللي لازم احكيهن عني ، احترت اول شي شو هو السر و شو هو غير السر … مالكن بطول السيرة .. إليكم ستة اسرار كما هو مطلوب بالتمام والكمال و فوقهن حبة بركة

1- ع قولة فرح .. هوس فقدان الاشياء

يعني ازا نازل بدي اشتري شي ومتاكد اني حطيت المصاري بجيبي ، اول ما بنزل من البيت برجع بتاكد وبلمسن ، ازا معي بطاقة هوية او جامعية او اي شي استلمتو جديد ، ازا بعتت حوالة بعد ما اطلع من المكتب بمترين رح ارجع اتاكد هل هية موجودة معي ولا لأ .. و العجيب انو لحد الان 100 % من الحالات كانو الاغراض بمكانها !

———————————

2- انا متشائل !

اى اى ، اميل حبيب كتب كتاب المتشائل و عبر فيه عني . اجمع التشاؤم و التفاؤل سوية بنفس الانسان ، بتمر علي فترات قمة بالتفاؤل واخرى جدا متشائم .. عموما انا متشائل ، يمكن منطقي او واقعي كلمة ادق عن موقفي تجاه الامور

———————————

3- 3 شغلات ما بحبن

حديث الرياضة ، السيارات ، الخرط

المباراة مدتها 90 دقيقة ، حديثها الرياضة بيستغرق اكتر من 200 دقيقة مع ضحايا بين قتيل وجريح

السيارات واخبارها وموديلاتها و التقسيم فيها كلو ما بحبو ولا بهمني ، عندي شهادة سواقة ولا مرة سقت سيارة بالبلد

الخرط شي مفروغ منو ، تبع نطيت من الجبل عالهيلوكوبتر وما صرلي شي ، شو مشان الفيل ياللي عم يطير هنيك شفتو ؟

هيك ناس بحب امشي معهن بالخرطة بس عند اقوى كوع بطقلو البرغي وبيطلع قد الكمشة يا حرام

———————————

4- بتردد بالقرارات البايخة

انو اكل بيتزا ولا همبرغر ولا شاورما … مسلن بكون مقرر براسي اكل بيتزا لما بوصل لهنيك بفكر اني أغير ، مثلا خلينا ناخد سبايسي .. لا والله روستو مدخن طيب كتير .. ويمكن احيانا اخد شي ما كان ضمن الخيارات كلها ^_^

———————————

5- ما بربط الاسماء بالأشكال بشكل جيد دائما

خاصة ازا تعرفت ع شخص جديد او شخص ما بشوفو كتير ، انو اوك اهلين كيفك ، بعد زمان والله ، فعلا بكون بعد زمان .. بس مالي متذكر اسمو .. او ازا اسم بعرفو منيح بس بضيع لأي شكل هاد .. لهيك ينصح يا جماعة كل واحد يحط اسمو ع صدرو وهو ماشي ، حتى ما حدى يضيع حدى ^_^

———————————

6- الحب ما بيدق باب غرفتك

لازم تطلع ، تطلع لبرى ، للحياة ، رح تشوفو .. ما تبحث عنه .. فقط اطلع .. القدر رح يوصلك اله ، انا مؤمن فيه ، و مقتنع بنصيبي وقسمتي ..

هي قناعتي

———————————————————————————

وهيك بكون كتبنا الوظيفة واخدنا العلامة الكاملة .. يورط المذكورين أدناه

1 – Resound

2 – مستر بلوند

3 – علوش

4 – فتوشة

5 – uramium

6 – معاذ

20 Comments
  1. fun says

    10من 10 أبو حميد
    ثابر وإلى الأمام

    1. ناسداك says

      اهلين fun … سعيد بمرورك الدائم

  2. وظيفة المدون .. ستة اسرار لا تعرفها عني…

    نبدء مع الشكر على التوريطة من ريم ، بس من التوريطات الحلوة بعالم التدوين . صراحة وصلني الواجب قبل الكتير من المدونين لكن كنت محتار بين شو هن………

  3. dima says

    لما عم بقرا الاسرار عم حس اني بتشارك تفاصيل مع كتير اشخاص 🙂

    حبيت هالواجب , شكرا للدعوة
    سيتم الرد قريبا 🙂

    1. ناسداك says

      حلو هالاحساس ديما .. بتحس حدى غيرك سارق شي من اسرارك ومعتبرو سرو .. وهو بحسك سارقو كمان

      سعيد بتقبلك التوريطة 🙂

  4. Reem says

    عشرة ناسداك
    قصة التردد بالطلبات كمان بتصير معي
    منيح عرفنا انك ما بتحب حديث الرياضة
    بس اذا بتضلك مهووس بفقد الاشياء شي نهار رح تفقدن

    اسرار ظريفة
    و علامة تامة

    1. ناسداك says

      اهلين ريمو

      اللي ما بحبو هو الحديث المعمق والتفصيلي بالرياضة ، هاد تبع التنقلات وتواريخ لقاءات كل فريق و الخطط والتكتيكات وتعلق خناقة الله ربها كرمال لعبة طابة

      تفي من تمك شو افقدن 🙁 تخيلي مسلن ضيع هويتي .. ولي .. سواني شوف ازا لسا بمطرحها ^_^

  5. Sea says

    والله أنا شايفة الدنيا خيار وفقوس حتى بكتابة الواجب التدويني

    بس في سر نسيت تقولوا إنك مرات بتكون سنفور غضباااااااان

    تسلم ايديك حتى بوظائفك مبدع،،،

    1. ناسداك says

      يا ساندي انا كوووول ع طووووول بس مدري مين الغضبان

      مرحبا بك هنا دوما

  6. عطاالله says

    والله يا سيدي مرحبا فيك بنادي الوسواس القهري … نحنا جماعة عنا حس امني عالي ومو مستعدين نخسر شي 🙂
    ومتل ما قلت الحب ما بدو حدن يدور عليه … لك بيجي لحالو شو ناقصنا هم 🙂
    سلامي لك

    1. ناسداك says

      وسواس قهري قلتلي … ولي كمان خوفتني .. لشوف مصرياتي بجزداني ياترى

      الحب ، من الهموم اللي منطلبها ولما نحصل عليها نندم كثيرا

      مرحبا فيك عطا

  7. دعدوشة says

    السر السادس كتير كتير حبيتو

    هلا معقول كل دفعة الثمانينات الهم وصمة خاصة فيهم ؟؟؟
    لانو عم نتشابه بكتير شغاليل

    حبيتهم كتير لهالاجوبة

    1. ناسداك says

      عجبتني هي دفعة التمانينات … حاسس حالي بالجامعة ^_^
      وانتي الصادقة جماعة 86 حصرا الهن وصمة خاصة فيهن

      مرحبا دوما دعدوشة بمطرحك هون ناطرك

  8. Kenan Alqurhaly says

    ما بتحب الخرط؟ يا اخي ما بصير يلي بشتغل بالخرط هم غالبية المجتمع ولازم تحترم شغلتهم

    صحيح أنو سر بس يعني الخرط واجب على كل مواطن مع رشوة معقولة اقل منها

    1. ناسداك says

      متل اي شغلات تانية منتشرة ولازم نحترمها ، طقيق البراغي مسلن ؟ المتملق مسلن ؟ وهكذا

      عجبني هالواجب . لازم نضيفو لدروس القراءة والاجتماعيات

  9. سيدة الزرقة says

    صرت شي خمسمية مرة قايلتلك لا تكتب إزا ومسلن

    رسوب من عندي

    1. ناسداك says

      🙁

      انا ما بحبك يا انثة

      و كل التلاميذ ما بحبوكي يا انثة

  10. مكتوب السعودية says

    المدونة رائعة شكرا لك ..

    1. ناسداك says

      اهلاااا فيك مكتوب السعودية

  11. Moaz says

    طولت لكتبت وظيفتي…
    بس أن تصل متأخراً……….. 😉

Comments are closed.

%d مدونون معجبون بهذه: