شي يدعو للفخر ( 1 )

http://ar.timeturk.com/images/news/18190.jpg

فخور لانو السوريين جوات سوريا و على كترة الخوازيق يلي بنجروها لبعض….احسن من تلت رباع السوريين يلي برات سوريا

فخور لانو سوريا من الدول يلي عندها صناعة البسة فاخرة لدرجة انو الانتاج المنيح بيتصدر و الزبالة بتبقى بالبلد منشان ما ننزع صورتنا برا….

فخور لانو صار عنا محلات مانجو و بيير كردان و جيورجيو ارماني بالشام و 90 بالمية من السكان بيقدرو بكل بساطة انو يفوتو عليهون و يشمو….و يطلعو

فخور لأن المواطن بيعرف يتفاهم مع الموظف والموظف بيعرف يتفهم مع المدير والشوفير مع الشرطي والطالب مع الانسة والطالبة مع دكتور الجامعة

فخور لاني بعرف انو كل السوريين بحبو بلدهون…………..على طريقتهون

فخور لانو كل شعبنا ” خزيت العين ” فهمان بالدين و السياسة و الاقتصاد و العمارة و الهندسة و الطبو الشعر و الفضاء و الموسيقى و النحت…على ذمتو طبعا

فخور لانو السوريين بعلكو كتير….قسم بيعرف شو عم يعلك…و قسم بيعلك المهم انو علك

فخور لانو البشر لوصلو لاوروبا….مرو بسوريا

فخور انني في سوريا: هذا البلد الذي يعطي للطبيب ((طالب الماجستير))المناوب في مشفى حلب الجامعي 15 ليرة سورية فقط لاغير كثمن جهده بعد مناوبة تستمر 24 ساعة و “هذه حقيقة ”

فخورة انو البنت ما فيها تمشي بالشارع دون ما تسمع 1000 تعليق و تلطيشة خلال نص ساعة فقط لاغير

فخور انني في سوريا: حيث تتعرض طبيبة داخلية للضرب والتهديد بالسلاح على يد اربعة مرافقين لاحدى المريضات ولم يستطع احد تحريك ساكن.

فخور أنو سوريا فيها أبو عبدو الفوال بحلب.. وأبو حسين مشان الحمص بزيت بحماه…. وبوز الجدي مشان الفتة بالشام…. وحارتنا مشان الحمص باللاذقية

فخور ان البنت السورية لما بتطلع من البيت بتحسب حساب فاعلين الخير اكتر ما تحسب حساب اذا ممكن حدا يأذيها

فخور أنو لسا في ببلادنا ناس بتنتخ وبتقول خسى الدييييب …. شرط انك تكون بنت

فخورة انو لهلاء عم ندرس المحاسبة عالدفاتر ونتعلم مسكها  مع انو ما ضل ورشة خياطة ولا محل ولا معمل ولا بنك  بيعتمد ع الورق ..  بس بتعرفو بيحسبو حساب تنقطع الكهربا او يتعطل الكمبيوتر ..

فخور لانو سوريا من الدول يلي ما عندها تعقيد بالقوانين……يعني ليش لحتى يحطو قوانين بيئية…بالرغم من وجود وزارة مع حقيبة….البيئة بأيد الله…و نحنا شعب مؤمن

فخور لانه لما بنزل لاشتري اي نوع خضرة بلاقي انو موت جوع ارحم بمية مرة

فخور انو الطيران العربي السوري عندو طيارين على مستوى عالي .. واسوأ اسطول طيارات

فخور لانو الشب السوري بيكون صايع….فجأة بيصير شيخ… و العكس صحيح

فخور لأن السوريين بيلاقو الشي الحلو من كل شي… يعني حتى لما الواحد بيسمن بيقولو صار عندو كرش للوجاهة

فخور انو السوريين مكشوفين…الطنبر بينعرف طنبر من اول لحظة مهما لف….و الحمار بينعرف حمار مهما لف….و الفهمان بينعرف انو فهمان…بدون ما يصرع سمانا انو هو فهمان….و طبعا الامر يعمم على الغبي والمعت و الطشمة و الممل و الفاضي و المليان و البخيل و الطفران و ابن العالم و ابن غير عالم

فخور انو  السوري ما بيقدر يحسد حدا على شي….لانو عندو القدرة على تطليع العيوب بالكمال ذاتو

أفخر بأني سوري ..

حيث هنا كل شيء يذبح حلالا

عدا اللحوم

أفخر بأني سوري…
أجدادي اخترعوا الأبجدية
وكانوا أول من صنع الزجاج والسفن
وداروا حول بحار الدنيا قبل كل البشرية

أفخر بأني سوري…
من بلادي انتشر الاسلام للعالم
ومن أرضي ظهرت المسيحية
وقدمت للعالم التشريع والقانون
ولا تقارنوا الأمس باليوم
حتى لايصيبكم الجنون…

أفخر بأني سوري….
نسمع بالعلق.
ولم نره في حياتنا..
اذاً من يمص دمنا؟

يتبع …

27 Comments
  1. وسيم says

    لاتعليق بانتظار الكمالة

    1. ناسداك says

      اهلا بقرائتك وسيم ، يبدو ان رحلتنا طويلة نوعا ما ،

  2. sallory says

    كلمات و مفخرة ع الوجع يا خيي 🙁

    1. ناسداك says

      من رحم هذا الوجع نفتخر به !

  3. اللجي says

    من شدة الفخر لسوري باذن الله
    اول فرصة …. واني مهاجر……

    1. ناسداك says

      شباب سورية يمضي حياته في الطوابير

      صغيرا طابور فرن الخبز
      يافعا طابور المدرسة
      شابا طابور السفارة !

  4. Bassam007 says

    من أروع ما قرأت في التدوين السورية في الـ 2010 لحد الآن… بانتظار الكمالة

    1. ناسداك says

      شكراً لك ، حملتني مسؤولية كبيرة

  5. دعدوشة says

    ايييييه بدنا نفخر كتير شكلنا

    1. ناسداك says

      اى كتير كتير ، لسا قدامنا خمسين صفحة word ترقبوا 🙂

  6. شكرا على المدونة

    1. ناسداك says

      عفواً

  7. حمزة says

    قولك ؟ !!
    ربما نحن من يفعل ذلك بنا ..
    وربما لا ..

    1. ناسداك says

      نعم نحن من نفعل ذلك ننكر الاعتراف بذلك ، لا بل نلعن من يحاول ان يفعل ذلك في كل منبر يتاح لنا الكلام به حتى لو كان الجمهور مؤلف من طفلك ذو العشر سنوات

  8. معين says

    عنجد مافي أروع منك بالوصف يامحمد

    1. ناسداك says

      شكرا معين 🙂

  9. dr.majed says

    أنا سوري.. آه يا خيبتي
    هيهي هي هيهيهي

    1. ناسداك says

      افخر افخر يا عزيزي

  10. amer ebrahim says

    كأنو حطيت تعليق وما نزل !!

    1. ناسداك says

      مدري ليه صنف النظام تعليقك على أنه spam على العموم ها قد عاد

  11. مخترع تحت القتل says

    بس ليكون المقصود بخس الديب للبنت هو انا ؟!!!!؟
    ليش نخزتني الابرة ما بعرف
    بس شي حلو انو تكتب بالعامية والله انا كتير بتخطر على بالي هيك فتيكات بس ما بدونها
    بس يصير اسمي ناسدك بدونها ههههه
    حلوة زميل غووو اون:)

    1. ناسداك says

      يي معقول تكون انت ؟

      يا سيدي قليل لاكتب بالعامية بس بالنهاية مو المهم لهجة الكتابة واسلوبها ، لان هاد وسيلة ، الاهم هو الهدف اللي بدك تحققه من النص اللي كتبتو

      تحياتي زميييييييييل 🙂

  12. لبنى says

    فخور لانو السوريين بعلكو كتير….قسم بيعرف شو عم يعلك…و قسم بيعلك المهم انو علك

    فخور لانو البشر لوصلو لاوروبا….مرو بسوريا

    فخور انو السوري ما بيقدر يحسد حدا على شي….لانو عندو القدرة على تطليع العيوب بالكمال ذاتو

    هدول النهفات التلاتة عنجد جايين تمام
    🙂

    و عبارة السوري الي مابيقدر يحسد حدا عشي ههههه والله تمام بس مع هيك
    أحسد سكان الكرة الارضية هنن السوريين .. بس شو السبب هاد الي مابعرفو لحد الان !
    بيكون الواحد عايش بستين نعمة .. و غني ومو ناقصو شي بتلاقيه ضاقت عينه على غيره ولو كان اخوه معتر و انه شلون حصل على الشي الفلاني وهو مامعو !
    يا ااخي خليه بحاله .. واكفيه شرك مادام مابدك تعطيه من خيرك

    لا عنجد الولوج الى عالم النفسيات السورية امر شائك وصعب ومعقد و بيجلط !

    يعني بدنا نحط ايدنا عالجرح الي هو نحنا ..
    قلوبنا فيها شي .. لأ مو شي واحد فيها اشياء واشياء

    والحقائق المؤلمة
    متل حكاية المناوبين .. للاسف ~ كل هالعقول و الامكانيات و القدرات تعامل بهالاسلوب الي مافيه تقدير ..
    وناس ببلاد تانية بتتقدر و بتتعلم و ما بتعطي شي .

    الله يصلح الحال احسن شي

    🙂

    تحياتي لك و لطرحك الفريد

  13. musab says

    برغم كل تلك التناقضات
    مازلنا نفتخر
    بالرغم الكثير من السلبيات فاننا نفتخر بالقليل من الايجابيات الموجودة
    والاهم من ذلك باننا ننظر الى انفسنا ونقول
    انا سوري وافتخر
    وانا كلي ثقة بهذا الكلام
    مشكور ناسداك واقع واوجاع سلبيات وهموم ومشاكل ذكرتها لكن يجب ان تفتخر

  14. adham says

    فعلاُ … لا تعليق ..

  15. Shbbk | شبك

    شي يدعو للفخر ( 1 )…

    فخور لانو السوريين جوات سوريا و على كترة الخوازيق يلي بنجروها لبعض….احسن من تلت رباع السوريين يلي برات سوريا فخور لانو سوريا من الدول يل………

  16. شي يدعو للفخر ( 1 )…

    فخور لانو السوريين جوات سوريا و على كترة الخوازيق يلي بنجروها لبعض….احسن من تلت رباع السوريين يلي برات سوريا فخور لانو سوريا من الدول يل………

Comments are closed.

%d