ذاكرة ضعيفة

23

ما بتذكر اول فنجان قهوة شربتو

مابتذكر يوم ولدت اختي الصغيرة

مابتذكر يوم اخدت اول شهادة

مابتذكر يوم شفت ابي اول مرة

مابتذكر يوم سمعت نشيد بلادي

مابتذكر يوم رسمت علمها

مابتذكر يوم شفتا

يمكن ذاكرتي ضعيفة

ما بتذكر اول فنجان قهوة شربتو … لكن بتذكر انو كانو يقولو القهوة تعمل شوارب بس ماما ونانا ما كان عندهن شوارب !

مابتذكر يوم ولدت اختي الصغيرة … بس بتذكر انو بعتوني جيب لهاية وحليب وفتلت نص البلد بالبرد وماكنت لاقي علبة حليب

مابتذكر يوم اخدت اول شهادة … بس بتذكر اني عزمت شلت الكف الأسود على بوظة كارينا ام العشرة على حسابي وبعدها قترت المصروف لأسبوع

مابتذكر يوم شفت ابي اول مرة … بتذكر اني لما سألتو وين كنت ؟ .. قلي مغترب للدراسة يا ابني

مابتذكر يوم سمعت نشيد بلادي … لكن بتذكر انو التلفزيون السوري كان يبدأ ويختم فيه لكن كان يفوتني لأني كنت افتح ع برامج الاطفال بعد ما ارجع من المدرسة

مابتذكر يوم رسمت علمها … بس بتذكر انو الانسة قالتلنا جيبو معكم الاشغال  احمر واخضر واسود والصمغ و انكت على صدريتي وتلزقت ببعضها

مابتذكر يوم شفتا … بس اكيد بتذكر انه كان مطر وبرد .. ونازل جيب من عند السمان علبة حليب لأختي الصغيرة

تفاصيل صغيرة … تكاد لا تعطى ادنى اهمية … لكنها الخيط الذي يعيد لنا الذكرى الكبرى … تنعش ثنايا الذاكرة بها

9 Comments
  1. حسام الاخرس says

    صحيح فنحن ننسى كثيرا يمكن من كتر وكبر وحجم مايدخل الى عقولنا كل يوم ولكن يبقى هناك حوادث ترمز للاحداث وتعيد الذاكرة جزئيا اتمنى ان تبقى ذكرياتنا جميلة دائما

  2. ranouche says

    الموضوع جميل جدّاً ..

    أنا ما بتذكر أغلبون … بس بعرف أني بحب القهوة الغربية بالنسبة الي الرواق هوة فنجان قهوة
    ما بتذكر يوم اللي ولد حدا من اخواتي لاني اصغر وحدة بس مستحيل انسى اليوم اللي اجت في بنت اختي اللي بموت فيها

  3. uramium says

    الذاكرة لا تختفي ربما تحتاج من ينعشها، أحياناً بمجرد تذكير أحد لي بجزء من حادثة قديمة جداً يرتسم الباقي بسرعة ببالي.

    بس شو مشان مافي شي اسمه forgetness 🙂

  4. gabriel says

    ما بتذكر الصورة اللي انت حاطتها … بس بتذكر اني مرة استعملتها بموضوع بيحكي عن العلاقة بين الاديان … قولتك ذاكرتي انا التاني ضعيفة ؟؟؟!!؟

  5. ناسداك says

    حسام :: قرأت منذ فترة في كتاب لإبراهيم الفقي وتكلم قليلاً عن النسيان والذاكرة .. فعلياً الإنسان لا ينسى ! لأنه هناك أكثر من 900 مليون خلية عصبية مهمتها الذاكرة .. الحفظ والتخزين والاسترجاع .. لكن ما يحدث هو التشويش ويعني التفكير في أكتر من منحى بدون تركيز لذلك يضيع الانسان ويعتبر نفسه قد نسى … دمت عزيزي بود

    رنوشة :: بتذكر يوم ولدت اختي الوسطى … يومها كان اجتماع اولياء امور بالمدرسة وكالعادة صرفونا بكير حتى ينصرف الاساتذة بينما اولياء الامور ما سمعوا بالاجتماع !

    يوراميوم : هذا هو رأس الخيط الذي نحتاجه دائما … حتى بقاعة الامتحان 🙂

    دبرها هلء وخليها كلمة جديدة ع الانكلش 😛

  6. اللجي says

    الذاكرة في الروح ويرتبط التذاكر بالاشياء التي تنعش الروح
    ولكن اذا كانت روحنا تائه مثلنا ماذا نفعل سوى نشعر بتخبط الذاكرة…

  7. lamis says

    هي مو ذاكرة ضعيفة هذا شي طبيعي يعني ما لازم نتذكر كل التفاصيل بس الأمور المهمة بتثبت بذاكرتنا بشكل فظيع
    يمكن ما بتتذكر أول شهادة بس بتوقع إنك بتتذكر شهادة البكالوريا أو التاسع

  8. manolia says

    أخ .. الذاكرة بالنسبة الي غرفة و ع حيطانها لوحات وهاللوحات مغطاية بقماش ما بعرف شوفي وراها .. بس يمر شي تفصيل صغير ادامي بيروح القماش من عاللوحة و بتبين ملونة وناصعة وكانها اليوم .. و ايه ذاكرتك مو ضعيفة .. ذاكرتك انتقائية :p ايه .. و بكرة يا ذكرى امبارح ..

  9. ناسداك says

    اللجي : جميل ما قلته … الذاكرة مرشد الروح ومن أضاع روحه تخبط في ذاكرته

    لميس : بتذكر اول شهادة … ولو ربطنا ذكرياتنا بمفاصل تدلل عليها لما نسينا شيء وان حكينا فيزيولوجيا فالانسان لا ينسى .. ولايوجد انسان ذاكرته ضعيفة … انما تتشوش بعدة مؤثرات تشعره بأنه نسي او ضاع

    مانوليا :: جميل تعبيرك بالذاكرة الانتقائية 🙂 … ولتكن تلك القطع القماشية جزء من الماضي ولوحاتنا بلا سواتر لتعبر عن جمالها الذي لا يخجل

Comments are closed.

%d مدونون معجبون بهذه: