كيفك ويوم الجمعة ؟

من زماااان كتير وماتغير روتين يوم جمعة عندي ، شخصياً اعتبره اليوم الأكثر مللاً من أيام الاسبوع ، على الاقل بباقي الايام بتكون ملتزم بجامعة او مدرسة او شغل وبيضيع نص النهار فيه وبترجع ع البيت لتكمل كم شغلة وبتلاقي حالك رايح تنام والنعس دخل جسمك وبلش ينهش فيه

اما يوم الجمعة .. ماعندك شغلة ولاعملة وبيعتبروه الناس يوم العطلة ليرتاحوا فيه .. لأ و النهفة هلء صارت العطلة جمعة وسبت كمان … فوق ما ربع السنة عندنا ياها عطل صاروا يومين عطلة بدال الواحد … هلء يوم السبت اوكي مبلوعة لانو الحياة موجودة وبتنزل من بيتك بتلاقي محل فاتح وعالم عم تمشي بالشوارع ، بينما يوم الجمعة بحس بقمة الملل … والمصيبة اذا فقت بكير وماعندك شي تعملو … فطور وخلصت … تلفزيون وتفرجت … صلاة ورحت … طيب وبعدين ؟ يعني لبين ما بيخلص هاليوم بحس روحي طلعت … بنزل المسا لاتفتل شوي وامارس هوايتي بالمشي وكأنه حظر تجوال والشوارع شبه خالية والمحلات مسكرة كلها والأسود في كل مكان حولك ..

ومشان تكمل معك من كل الاطراف … بتتصل برفقاتك لتعمل معون شي نزلة او مشروع على شي محل بتلاقي اذا مو الكل فالمعظم مشغول وانا لحالك يا مسطول !! … وتطبيقاً لقانون الطبيعة .. يوم اللي بتكون انت مشغول الكل بيجي بيقلك وينك يا زلمة ما عم نشوفك تعى نعمل شي نزلة ؟ .. انو شو مشان خبرتكم يوم الجمعة وماحدى طلع وسبحتوني ؟؟

بتجي لتدخل على النت يوم الجمعة لتضيعلك كم ساعة بشي شغلة مفيدة او مامفيدة بس احسن من كش الدبان بتلاقي السرعة شي خارق يا سلام .. يعني بالأيام العادية النت عندنا بسورية عم يدخل بطلوع الروح ( عم احكي عن جماعة الـ dial up أمثالي ) فما بالك يوم الجمعة وكل الناس ببيوتها واللي ما بيعرف شو هاد انترنت اشترالو بطاقة بحق باكيت الدخان وقعدت يخبص … ومتل مابتعرفوا عندنا الطاقة الاستيعابية للمخدمات كافية وزيادة وما بيطلعلك مشغول طاول طاول ( اتحداك يطلعلك مشغول من بعد المحاولة الألف للاتصال ) وبتلعن هديك الساعة اللي فكرت فيها تدخل عالنت لتضيع شوية وقت ..  واذا .. يعني اذا اذا علق معك الخط ودخلت بقى خدلك شوط تمشاية وزيارة لغرف البيت لحتى تفتح صفحة الايميل ولاتنسى فنجان القهوة جنبك حتى تحافظ على الهدوء …

مابعرف انا هيك بيعدي معي يوم الجمعة بالعادة ملل ولاشغلة ولا مشغلة غالبا عم انزل اتمشى شي ساعتين تلاتة لحالي بالليل .. بالاضافة لكم روتين يومي لابد منهم

بالنسبة إلك … كيف بتقضي يوم الجمعة ؟ وهل تعتبره متلي يوم ممل ولا حافل بالنشاطات وبتتمنى يصير عنا يومين جمعة بالاسبوع !!

6 Comments
  1. fatosha says

    المصيبة بمجتمعنا مافي شي اسمه ثقافة الرحلات

    كيف يعني؟ نطلع هيك طلعة ونستكتشف بلادنا، مو مجرد نقعد بمطعم وناكل!

    نروح ونمشي ونضيع ..

    بتمنى لو كان فيني .. بس طبعاً لحالي كبنت مافيني ..

    وكل ما بقول هالحكي لحدا بيضحك عليي!

  2. Ahmad Edilbi says

    عجبني موضوعك .. بالنسبة ليوم الجمعة مو أكتر من رياحة
    من وجع الراس شوي .. وموضوع الروحات والجيات
    بقصرو قدر المستطاع فهاليوم هو أعدة بالبيت وبس !!

    تحياتي

  3. Rami says

    أنت لازم تتبع تكتيكات مسبقة ليوم الجمعة .. يعني متل ما بعمل انا تماما ..
    الحل هو يوم الخميس .. يوم النشاطات من العيار الثقيل ,, أهم شي ما تدخل ع البيت لوقت متأخر و حتى لو كنت تعبان ما تنام يا أخي .. خليك صاحي .. يعني مثلا انا نمت يوم الجمعة الساعة 7 الصبح.
    فتخيل كيف خلص يوم الجمعة من دون ما حس فيه .. لا تستسلم لهاليوم العصيب.

  4. mhabach says

    fatosha
    ====

    اليوم كنت عم احضر برنامج ع الجزيرة الوثائقية وطالعولنا بالصين كيف بيقضوا نهاية الاسبوع بيطلعوا لشي منطقة برى البلد والضجة والتلوث وبيعملو رحلة على نمطهم الخاص … شي كتير راقي … هلء يمكن تكون المدنية زاحفة على معظم البلد عندهم ومافي هالمناطق الاثرية وغيره عكس ما عنا … لو الواحد بكل شهر طلع مرة وحدة على الاقل برحلة لشي محل مابيعرف عنو غير بالتلفزيون .. وحتى تلفزيونا مقصر بناحية السياحة الداخلية كتير … كان قضى عمروا وما خلصت الاماكن اللي ممكن نزورها

    دائما كلمة الحقيقة غريبة وغير محببة … هي طبيعة النفس البشرية

    احمد ادلبي
    ======

    والله انا ببقى قاعد تقريبا للساعة 10 المسا وبعدين بلاقيلي شي نزلة وان ما لاقيت بنزل لحالي ! اهلا فيك عزيزي

    رامي
    ===

    يا زلمة كل يوم بكون عامل قبلو بيوم ليستة بعقلي عن النشاطات اللي رح اعملها بهاليوم إلا يوم الجمعة ما بلاقي شي اعملو فيو 🙁
    حلو الواحد يقضي يوموا بالنوم بس كنت فترة نام الصبح وما اشبع نوم كتير لهيك عم نام الساعة 3 او 4 الفجر

  5. علوش says

    لك نعمة كريم، شبو الملل، والله شعور لذيذ وحلو، هيك تطقطق عضامك من الملل، تنعم بنعمة البطالة واستمتع بشعور الفراغ واللانتماء.

  6. alaa says

    أنا عني هاد اليوم الاكتر نحس ..

    العيلة كلها بالبيت .. وكلهن بيقعدو .. وعلى نكد وملل ..

    وفوق منها بيجو ضيوف كتير لعنا ..

    باختصار .. يوم بحسو كتير كتير ضايع ومابستفيد منو بشي ..

    وفوق منها نكد !

Comments are closed.

%d