مدونة ناسداك

زمان .. كان الموز .. عنا نحن السوريين .. رمز للأثرياء .. كنا لما نشوف ولد صغير رايح ع مدرستو الصبح .. و بإيدو موزة .. مابهم شو نوعها .. صومالي ولا لبناني .. المهم موز .. كان يدل فوراً ان هاد ابن عائلة غنية ..

كان كيلو الموز وسطيا 60 ليرة و يوصل احيانا لاكتر من 100 ليرة بحسب المواسم .. كان طعم .. او بالأحرى نكهة الموز نستلذ فيها بالبوظة .. او بالأحرى المي المخلوطة بنكهة موز صناعية ومجمدة .. اى كان هيك اكتر شي منعرفو عن الموز .. وصار وقتها عندنا ما يسمى بعقدة الموز ..
(اقرأ المزيد …)

مرة رحنا انا و اخواتي لعند جدو شكينا بابا

نحن : جدو .. بابا ما عم يجبلنا موز

جدو بهدل بابا .. بابا بهدلنا

من كم يوم

رحنا انا و اخواتي لعند جدو شكينا بابا

نحن : جدو .. بابا ما عم يجبلنا بندورة

جدو ما حكى شي مع بابا .. بابا ما حكى شي معنا

وصرنا نعمل الجظمظ بالموز

مواطن : مرحبا شريك شو اخبارك

شريك : اهلين

مواطن : شبك مجقوم وشك ع القناة التانية … افردا

شريك : وهي فردتا
(اقرأ المزيد …)

دخل غرفته متنشطاً على غير العادة .. امتطى صهوة اللابتوب كالعادة .. نظر بجانب عينه فرأى السكرتون .. وهو ما يدعى بخزانة الملابس او دولاب الملابس .. الحاصلو لمعت لمبة افكاره .. والله صار لازمها نفض .. والنفض يا سادة يا نسكافيه هو عملية إعادة بث الحياة في أي شيء فتقوم بتغير ملامحه و كب كل ما لا يلزمك و اعادة ترتيب ما يلزمك … تماما كنفض السيارة .. البيت .. السقيفة .. و حتى الزوجة !!

المهم اعتبر ان تخته مخصص للاشياء التي تلزم .. و التخت الثاني هو للاشياء التي يلزمها كب .. وضع كمامته و نظارات الوقاية و الخوزة وانطلق

دفاتر دعاية ذات صفحات فارغة خبئها لتكون مسودات يحل عليها المسائل ، خصوصية هذه الدفاتر انه حصل عليها من جاره ابو محمد والذي يعمل مندوباً طبياً لأحد شركات الادوية ، ابو محمد هذا كان سبب في متابعة حياة صاحبنا من بعد الله طبعا ، لذا احتفظ بها .. مات ابو محمد .. و راحت ايام المسائل ولازالت الدفاتر بصفحات بيضاء
(اقرأ المزيد …)

عندما يجلس ابو صفوح متأبطاً اركيلته و امام كاسة الشاي و كيس بزر شمس و الاولاد يبحتون في الغرفة و ام صفوح رايحة جاية على خط مطبخ – غرفة القعدة ، يبدأ تفاعل ابو صفوح مع صافرة البداية ، يستمر زخ العرق و طرق المسبات للحكم و اعداد الخطط طول الشوط الاول ،ينتهي الشوط الأول بهدف لفريق ابو صفوح و تقوم الحجة ام الولاد بتبديل كاسات الشاي و فتح كيس بزر جديد و تظبيط ضرب المتة كما وتبدل راس الاركيلة ويبدأ الاكشن .

ابو صفوح يضع امامه كرشه و ورقة رسم عليها الخطة C المعدلة للمرة السابعة ، يحمر وجهه عندما يرى ان المدرب طلب تبديل احد اللاعبين الذي يعتبر حجر ارتكاز في خطة ابو صفوح ، يمزق الورقة و يكتب على واحدة جديدة .. الخطة C المعدلة للمرة الثامنة . يعيد رسم اللاعبين و الكرة تنتقل بينهم .

يطمئن ابو صفوح على الوقت و يركز على خطته الهجومية لتعديل النتيجة ، حسب الخطة المفروض ان اللاعب رقم 12 ان يكون ظهير ايمن ولكن بحسب الشاشة فهو لاعب وسط ، يتفتف و يمتمت ، يسحب نفس اركيلة عميق و يشفط كل المي الموجود بكاسة المتة .. يجلس قعدته و يصيح بأعلى صوته ، لك يا حمار فوت معو ساعدو .

هنا يمد صفوح رأسه و يقول : انا الكبير ، خلي الصغار يساعدو

تبقى عشر دقائق على نهاية المباراة و فريق ابو صفوح متقدم بهدف لكن الوضع غير مطمئن .. تبديل لمضيعة الوقت والفريق يمشي تماما على  الخطة E المعدلة للمرة الثانية وان استمر الحال هكذا سيخرج رابحا ..

المفاجئة .. طبخة الملوخية تحترق على الغاز و ام صفوح تولول ، يا حجييي احترقت الطبخة ، ابو صفوح ينتع كفرية ويلحقها بمسبة في اقصى الزاوية ويحرز هدفاً ، هدفـــــ هـــدفــــ غوووووووول ، يقفز من مكانه و يهر جزء جديد من السقف على جيران ابو صفوح .

يسحب البمبكشن من الخزانة و يمطر الحارة بسبع طلقات معلناً فوز فريقه !

ابو صياح : مرحبا حسني افندي
حسني : اهليييين ابو صياح
ابو صياح : لك وين هالغيبة يا حسني افندي
حسني : والله كنت طالع سياحة بالبحر
ابو صياح : شي حلو والله .. يعني رحت عاللاذقية ؟
حسني : لا رحت فتلت بالبحر بين هالدول
ابو صياح : اى وشلون رحت
حسني : والله طلعتلك بالسيارة ع اللاذقية ومن هنيك اخدت باخرة وفتلت من اللادقية لبيروت للاسكندرية لطرابلس لتونس و الجزائر و مراكش وبعدها رجعت اسبانيا و فرنسا و ايطاليا و اليونان و قبرص .. و رجعت اللادقية
ابو صياح : والله شي ناهي يا حسني .. انبسطت كتير ماهيك
حسني : اى يا ابو صياح شفتلك شي 12 بحر متوسط
ابو صياح : شه .. شلون ظبطت معك هاي .. انا اللي بعرفو كلن ع بعضن بحر متوسط واحد
حسني : لا هنن 12 و انا فتلتن كلن بجولتي
ابو صياح : ما دخلت أعلي هي .. شرحلي ياها
حسني : هاد انا وصلت ع اللادقية سالتن هاد اي بحر .. قالولي المتوسط .. ولما وصلت الاسكندرية سألتن هاد البحر شو اسمو .. قالولي المتوسط .. ولما وصلت مراكش قالولي متوسط و هيك كل ما انزل ببلد يقولولي المتوسط
ابو صياح : حسني حبيبي .. انا اللي بعرفو انو الواحد بيطلع من بلدو فهمان بيرجع عليها حمار .. بس مو حدى يطلع من بلدو حمار ويرجع حمار

من مسرح الشوك للثنائي المبدع .. رفيق سبيعي و نهاد قلعي

فخور انو السوريين نالو اسوء مستوى تعليم بمجال اللغة و الكمبيوتر….بس مع هيك نسبة السوريين الفهمانين بهل المجالات بتسبق كتير عرب

فخور انو في عنا امكانيات كبيرة بحرفنة القص واللصق ووضع المواضيع الرنانة

فخور بانو اكتر الردود بالمنتديات
شكرا لمواضيعك الحلوة…..
رائع…. دايما ابهرنا بمواضيعك الحلوة……
كتير حلوين… يسسلمو ايديك….
جميل …. يسلمون يا رب….
نعم وانا اوافقك ايضا….

وين المشكلة إذا كل المواضيع رائعة و كل المساهمات براقة ، إذا كان ورائها عضوة ؟

أفخر بأني سوري…
يقولون عندنا
بأن للحيطان آذان
في حين لم يصل هذا الاختراع لليابان

أفخر بأني سوري…
مازلنا ننتظر مجالس الافتاء
لتقول لنا هذا حلال وذاك حرام
والغرب يناقش ان كانت آلة الزمن تعود للخلف
أم انها تسير فقط للأمام

(اقرأ المزيد …)

فخور لانو السوريين جوات سوريا و على كترة الخوازيق يلي بنجروها لبعض….احسن من تلت رباع السوريين يلي برات سوريا

فخور لانو سوريا من الدول يلي عندها صناعة البسة فاخرة لدرجة انو الانتاج المنيح بيتصدر و الزبالة بتبقى بالبلد منشان ما ننزع صورتنا برا….

فخور لانو صار عنا محلات مانجو و بيير كردان و جيورجيو ارماني بالشام و 90 بالمية من السكان بيقدرو بكل بساطة انو يفوتو عليهون و يشمو….و يطلعو

فخور لأن المواطن بيعرف يتفاهم مع الموظف والموظف بيعرف يتفهم مع المدير والشوفير مع الشرطي والطالب مع الانسة والطالبة مع دكتور الجامعة

فخور لاني بعرف انو كل السوريين بحبو بلدهون…………..على طريقتهون

فخور لانو كل شعبنا ” خزيت العين ” فهمان بالدين و السياسة و الاقتصاد و العمارة و الهندسة و الطبو الشعر و الفضاء و الموسيقى و النحت…على ذمتو طبعا

فخور لانو السوريين بعلكو كتير….قسم بيعرف شو عم يعلك…و قسم بيعلك المهم انو علك

فخور لانو البشر لوصلو لاوروبا….مرو بسوريا

فخور انني في سوريا: هذا البلد الذي يعطي للطبيب ((طالب الماجستير))المناوب في مشفى حلب الجامعي 15 ليرة سورية فقط لاغير كثمن جهده بعد مناوبة تستمر 24 ساعة و “هذه حقيقة ”

فخورة انو البنت ما فيها تمشي بالشارع دون ما تسمع 1000 تعليق و تلطيشة خلال نص ساعة فقط لاغير

(اقرأ المزيد …)