عن الموز و البندورة .. حكاية شعب

زمان .. كان الموز .. عنا نحن السوريين .. رمز للأثرياء .. كنا لما نشوف ولد صغير رايح ع مدرستو الصبح .. و بإيدو موزة .. مابهم شو نوعها .. صومالي ولا لبناني .. المهم موز .. كان يدل فوراً ان هاد ابن عائلة غنية ..

كان كيلو الموز وسطيا 60 ليرة و يوصل احيانا لاكتر من 100 ليرة بحسب المواسم .. كان طعم .. او بالأحرى نكهة الموز نستلذ فيها بالبوظة .. او بالأحرى المي المخلوطة بنكهة موز صناعية ومجمدة .. اى كان هيك اكتر شي منعرفو عن الموز .. وصار وقتها عندنا ما يسمى بعقدة الموز ..

لما كانت الانسة تسألنا برمضان .. شو فطوركم اليوم يا طلاب .. يجاوبو الطلاب اشكال الوان .. شاكرية و رز .. ملوخية .. كباب بكرز .. مشاوي .. محشي .. يبرق … و جظمظ …

الجظمظ حكيتلكن عنو بزمانو .. كان عبدو ما يخجل لما يقول انو فطورهن اليوم جظمظ .. 3 كيلو بندورة و 5 بيضات .. الطبخة كلها بتطلع بمية ليرة .. وخلصت .. على قد بساطك مد رجليك
هالايام .. صار الموز طعام الفقراء .. لدرجة الكيلو من الموز سعره 25 ليرة و كتير شايف اشخاص عم ياخدو 8 كيلو موز وأخضر خليه يستوي عندو بالبيت …

انفقدت البندورة متل كتير اشياء من حياتنا … حتى لو قدرو ليمنعوها من صندويش الفلافل ويحطو بدالها موز .. كيلو البندورة وصل من مدة 60 ليرة وما بقى ابدا الجظمظ غدا يدل على الفقراء …
وهيك تدريجيا اختفت عقدة الموز من حياتنا .. وصارت بالأعراس تضيف موز ضمن جاط الفواكه بعد ما كان مقتصر على الفلل و البيوت الكبيرة ..

وهي حكاية شعبي بين الموز والبندورة .. و عيشي يا أمة

15 Comments
  1. firasoo says

    متل مافي مصادر طاقة بديلة نحن كمان بدو يصير عندنا مصادر سلطة بديلة ،البندورة البلدي رايحة لبراوالبلاستيكية ما بتواتي معدة هالشعب ، لذلك مالنا غير الموز
    وطوّل بالك لسه .. لنصير ناكل كيوي بدل الخيار

    1. ناسداك says

      كويس .. السلطة تتكون من موز و كيوي و شوية بقدونس .. العالم بدها تعيش

  2. سيدة الزرقة says

    لك احمد ربك اللي عم تلاقي شي رخيص تشتريه..مابقا تنق وتقول موززز..

    1. ناسداك says

      الجمل بقرش و قرش مافي ..

      صرنا ننق ونقول بندوووووورة

  3. عن الموز و البندورة .. حكاية شعب…

    زمان .. كان الموز .. عنا نحن السوريين .. رمز للأثرياء .. كنا لما نشوف ولد صغير رايح ع مدرستو الصبح .. و بإيدو موزة .. مابهم شو نوعها .. صومالي ولا لب………

  4. باسل says

    ظريف كتير، ذكرتني بهي العقدة
    سنبدأ من الآن فصاعدا بشراء نكهة البندورة الصناعية 🙂 وهيك بنصير بناكل بيض منكّه وفيك تكتر النكهة شوي
    تحياتي

    1. ناسداك says

      اووووه ع نكهة البندورة .. وهيك علماء الكيمياء بيتفننو بالنكهات وكل كم سنة بيخترعولنا نكهة جديدة .. ورح يجي يوم يعملولنا نكهة الخس !

  5. ررسلان says

    حلوة محمد مع انو ما برد بالعاده على مقالات بس فعلا بتستاهل التعليق والشكر
    تابع كتاباتك ولا تحرم القراء
    يعني بيحكو انو الراسماليه قد ولت بلا عودة!! وكل يوم منعيش فصل جديد من فصول اكل البندورة…..
    عفوا اكل الموز

    1. ناسداك says

      مرحبا فيك رسلان …

      نحن بسورية حكومتنا اخترعت تسمية جديدة لنظام اقتصادي جديد سمته ( اقتصاد السوق الاجتماعي ) وهو محاولة ايجاد توليفة بتمزج بين الرأسمالية ( سوق ) و الاشتراكية ( اجتماعي ) وطبعا هالنظام الجديد التحول إليه رح يولد آثار سلبية جدا على المجتمع والحكومة عم تحاول هالاثار تجينا بالتدريج .. منلاحظ ليتر المازوت من 7 ليرات الى 22 ليرة .. كيلو السكر من 25 ليرة للـ 60 ليرة .. ولسا الحبل ع الجرار

  6. لينا بني المرجة says

    يعني و الله نحنا ما بيعجبنا العجب!!
    طب شوفو فوائد هالتنوع..
    من جيل لجيل عم ناكل -غصب عنا- على كل درس لون..مرة أحمر ومرة أصفر
    بعدين عم يحاولو ما يتركو عنا عقد..عم يفكو عقدة و يربطو غيرها!!
    و لا تنسى أنو التماري بكعك أطيب من الكاتشاب..يعني صار منى عين الشعب يكون الكاتشاب على موز…
    ما بتتذكر شو قلو؟
    قلو:شو أطيب من البندورة؟
    قلو:موز ببلاش..

    لك الحمد لله..موز ولا منجا..
    نسد الرمق بلقمة مغمسة بالدم…
    مسرورة كتير لمروري بالمدونة..و أصريت علق عالموضوع مع أنو صرلو زمان..
    بس بالفعل في إبداع..
    بالتوفيق

  7. free movie download says

    i like it عن الموز و البندورة .. حكاية شعب « مـدونـة ناســداك after this im your rss reader

  8. مجرد أنثى says

    وعندك من كام يوم شفتهم عم يقلو الموز عالتلفزيون يعني ممكن نصير ناخدو بدل البطاطا و بعدكم عم تقولو ما في شي بيتاكل؟
    لك منيح في بوتاسيوم احسن من بلا

  9. جلنار says

    60 ليرة!!
    يعني ما بقا فيه طبقة متوسطة!!
    60 ليرة والله كتير كتير, طيب المعاشات كيف؟؟ يعني الدخل بيكفي الانسان العادي او المتوسط انه يعيش بكرامة؟
    تحياتي

  10. amer ebrahim says

    انا لسه عندي عقدة بيجو 504 ستيشن

  11. عبود ابوهشام says

    شوهاد الموز ؟؟هههههههه

Comments are closed.

%d