وظيفة المدون .. ستة اسرار لا تعرفها عني

نبدء مع الشكر على التوريطة من ريم ، بس من التوريطات الحلوة بعالم التدوين .

صراحة وصلني الواجب قبل الكتير من المدونين لكن كنت محتار بين شو هنن الاسرار الستة اللي لازم احكيهن عني ، احترت اول شي شو هو السر و شو هو غير السر … مالكن بطول السيرة .. إليكم ستة اسرار كما هو مطلوب بالتمام والكمال و فوقهن حبة بركة

1- ع قولة فرح .. هوس فقدان الاشياء

يعني ازا نازل بدي اشتري شي ومتاكد اني حطيت المصاري بجيبي ، اول ما بنزل من البيت برجع بتاكد وبلمسن ، ازا معي بطاقة هوية او جامعية او اي شي استلمتو جديد ، ازا بعتت حوالة بعد ما اطلع من المكتب بمترين رح ارجع اتاكد هل هية موجودة معي ولا لأ .. و العجيب انو لحد الان 100 % من الحالات كانو الاغراض بمكانها !

———————————

2- انا متشائل !

اى اى ، اميل حبيب كتب كتاب المتشائل و عبر فيه عني . اجمع التشاؤم و التفاؤل سوية بنفس الانسان ، بتمر علي فترات قمة بالتفاؤل واخرى جدا متشائم .. عموما انا متشائل ، يمكن منطقي او واقعي كلمة ادق عن موقفي تجاه الامور

———————————

3- 3 شغلات ما بحبن

حديث الرياضة ، السيارات ، الخرط

المباراة مدتها 90 دقيقة ، حديثها الرياضة بيستغرق اكتر من 200 دقيقة مع ضحايا بين قتيل وجريح

السيارات واخبارها وموديلاتها و التقسيم فيها كلو ما بحبو ولا بهمني ، عندي شهادة سواقة ولا مرة سقت سيارة بالبلد

الخرط شي مفروغ منو ، تبع نطيت من الجبل عالهيلوكوبتر وما صرلي شي ، شو مشان الفيل ياللي عم يطير هنيك شفتو ؟

هيك ناس بحب امشي معهن بالخرطة بس عند اقوى كوع بطقلو البرغي وبيطلع قد الكمشة يا حرام

———————————

4- بتردد بالقرارات البايخة

انو اكل بيتزا ولا همبرغر ولا شاورما … مسلن بكون مقرر براسي اكل بيتزا لما بوصل لهنيك بفكر اني أغير ، مثلا خلينا ناخد سبايسي .. لا والله روستو مدخن طيب كتير .. ويمكن احيانا اخد شي ما كان ضمن الخيارات كلها ^_^

———————————

5- ما بربط الاسماء بالأشكال بشكل جيد دائما

خاصة ازا تعرفت ع شخص جديد او شخص ما بشوفو كتير ، انو اوك اهلين كيفك ، بعد زمان والله ، فعلا بكون بعد زمان .. بس مالي متذكر اسمو .. او ازا اسم بعرفو منيح بس بضيع لأي شكل هاد .. لهيك ينصح يا جماعة كل واحد يحط اسمو ع صدرو وهو ماشي ، حتى ما حدى يضيع حدى ^_^

———————————

6- الحب ما بيدق باب غرفتك

لازم تطلع ، تطلع لبرى ، للحياة ، رح تشوفو .. ما تبحث عنه .. فقط اطلع .. القدر رح يوصلك اله ، انا مؤمن فيه ، و مقتنع بنصيبي وقسمتي ..

هي قناعتي

———————————————————————————

وهيك بكون كتبنا الوظيفة واخدنا العلامة الكاملة .. يورط المذكورين أدناه

1 – Resound

2 – مستر بلوند

3 – علوش

4 – فتوشة

5 – uramium

6 – معاذ

عن محمد حبش

يمكنك متابعة المدونة أيضاً عبر فايس بوك، تويتر، التغذية، و النشرة البريدية

شاهد أيضاً

المعضلة الأخلاقية للطبقات الوسطى العربية

لا يوجد طريق وسط إن مظاهر العنف التي اجتاحت الشرق الأوسط شتت انتباه العالم من …

20 تعليق

  1. 10من 10 أبو حميد
    ثابر وإلى الأمام

  2. لما عم بقرا الاسرار عم حس اني بتشارك تفاصيل مع كتير اشخاص 🙂

    حبيت هالواجب , شكرا للدعوة
    سيتم الرد قريبا 🙂

    • حلو هالاحساس ديما .. بتحس حدى غيرك سارق شي من اسرارك ومعتبرو سرو .. وهو بحسك سارقو كمان

      سعيد بتقبلك التوريطة 🙂

  3. عشرة ناسداك
    قصة التردد بالطلبات كمان بتصير معي
    منيح عرفنا انك ما بتحب حديث الرياضة
    بس اذا بتضلك مهووس بفقد الاشياء شي نهار رح تفقدن

    اسرار ظريفة
    و علامة تامة

    • اهلين ريمو

      اللي ما بحبو هو الحديث المعمق والتفصيلي بالرياضة ، هاد تبع التنقلات وتواريخ لقاءات كل فريق و الخطط والتكتيكات وتعلق خناقة الله ربها كرمال لعبة طابة

      تفي من تمك شو افقدن 🙁 تخيلي مسلن ضيع هويتي .. ولي .. سواني شوف ازا لسا بمطرحها ^_^

  4. والله أنا شايفة الدنيا خيار وفقوس حتى بكتابة الواجب التدويني

    بس في سر نسيت تقولوا إنك مرات بتكون سنفور غضباااااااان

    تسلم ايديك حتى بوظائفك مبدع،،،

  5. والله يا سيدي مرحبا فيك بنادي الوسواس القهري … نحنا جماعة عنا حس امني عالي ومو مستعدين نخسر شي 🙂
    ومتل ما قلت الحب ما بدو حدن يدور عليه … لك بيجي لحالو شو ناقصنا هم 🙂
    سلامي لك

    • وسواس قهري قلتلي … ولي كمان خوفتني .. لشوف مصرياتي بجزداني ياترى

      الحب ، من الهموم اللي منطلبها ولما نحصل عليها نندم كثيرا

      مرحبا فيك عطا

  6. السر السادس كتير كتير حبيتو

    هلا معقول كل دفعة الثمانينات الهم وصمة خاصة فيهم ؟؟؟
    لانو عم نتشابه بكتير شغاليل

    حبيتهم كتير لهالاجوبة

    • عجبتني هي دفعة التمانينات … حاسس حالي بالجامعة ^_^
      وانتي الصادقة جماعة 86 حصرا الهن وصمة خاصة فيهن

      مرحبا دوما دعدوشة بمطرحك هون ناطرك

  7. ما بتحب الخرط؟ يا اخي ما بصير يلي بشتغل بالخرط هم غالبية المجتمع ولازم تحترم شغلتهم

    صحيح أنو سر بس يعني الخرط واجب على كل مواطن مع رشوة معقولة اقل منها

    • متل اي شغلات تانية منتشرة ولازم نحترمها ، طقيق البراغي مسلن ؟ المتملق مسلن ؟ وهكذا

      عجبني هالواجب . لازم نضيفو لدروس القراءة والاجتماعيات

  8. صرت شي خمسمية مرة قايلتلك لا تكتب إزا ومسلن

    رسوب من عندي

  9. المدونة رائعة شكرا لك ..

  10. طولت لكتبت وظيفتي…
    بس أن تصل متأخراً……….. 😉

أضف تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

%d مدونون معجبون بهذه: