اجى الصيف ورحلات الكيف

مصيف للسياحة والسفر يذكر زبائنه الكرام بأشهر و أرخص الرحلات الصيفية المحلية والمتوفرة للجميع

رحلة الفرنلق  ( ام الميتين ليره )
رحلة تشمل التنزه وسط ما كان يعرف بغابات الفرنلق والشواء وسط القمامة و اكياس البلاستيك .. الهواء النقي الممزوج برائحة عوادم باصات المازوت

رحلة المغارات ( بمية وخمسين ما عدا البنزين )
رحلة تتلخص في البحث عن مكان يصلح للجلوس لمدة ساعتين .. ثم افتراش التراب بجانب الشارع وشفط الاركيلة مع ارتداء الشحاطة الرجالية

رحلة البحر ( بتنط الألف ليره )
رحلة على الشاطئ الصخري المليئ بالحصى والرمل الأسود … السباحة بالملابس الداخلية بالنسبة للرجال والبيجامات الرجالية بالنسبة للسيدات .. الدوش من البحر مباشرة

عزيزي المصيف .. جميع الرحلات بدون موعد مسبق او حجز عملاً بقاعدة ( اللي بيسبق بياكل بندق ) .. لا تنسى أن تساهم بدورك في زيادة التلوث وتلحش جميع مخلفاتك في المكان

مع اطيب الامنيات بصيف جميل
مكتب مصيف للسياحة والسفر

12 Comments
  1. سيدة الزرقة says

    على كتر ما نزعوا الطبيعة والبيئة عنا منشوف آرمات
    “تركيا جنة الأرض”معبية الشوارع والساحات

    ودٌّ

    1. ناسداك says

      بغض النظر على أن تركيا فعلاً جنة الأرض ، المشكلة بالأصل فينا نحن ما عم نعرف نستثمر مواردنا الكبيرة بالشكل الامثل ومتل ما الكل بيعرف ان السياحة صناعة مهمة جدا وتعتمد عليها كتير دول بزيادة الدخل القومي .. حتى بتشكل عصب اقتصاد بعض الدول … عنا للأسف بتلاقي لا الجبال ولا الشواطئ ولا حتى المغارات مخدمة بالشكل المناسب وان حدث وتخدمت فالشعب كفيل بانه ينزعها

      تحية

  2. ريـــم says

    كانت دايما امنيتي اني شوف بسوريا اماكن سياحية مخدمة بشكل صحيح
    هالشي مابيعني عدم وجود بعض الاماكن
    بس للاسف في مناطق حلوة كتير و قطعة من الجنة بس ما فيها لا اهتمام ولا عناية سياحية
    عموما .. بمجرد تخديم المناطق السياحية .. رح ترتفع تكاليف هيك رحلات
    والمعتر الدرويش اللي عم بيقدر يشم شوية هوا .. رح يبطل يقدر

    يللا كلو منيح

    1. ناسداك says

      الاماكن موجودة وبشكل كبير والدليل ان اول ما نلاقي منطقة ماحدى كان بيعرفا وسلط احدهم عليها الضوء بتشوفي كيف العالم زحفت الها .. مثلا منطقة سمرا انا بعرفها من زمان انها رائعة ورفقاتي كتير راحو عليها وحكولي عنها بس لما صورو مسلسل ضيعة ضايعة فيها انقلبت المنطقة من مهجورة مافيها غير السكان العاديين الى منطقة فيها سواح وعالم رايحة جاية وحتى الصورة التذكارية بخمسين ليرة قدام المخفر او بيت احد الشخصيات

      المشكلة بدها ثقافة واموال .. الاموال ممكن تدبريها بس الثقافة صعب تلتقى بسهولة
      مرحبا ريم

  3. sallory says

    صباح الخير

    فعلاً متل ما قلت و أكتر , خبروني رفقاتي بروحة راحوها على غابات الفرنلق فعلاً متل ما وصفت إنت , شبعوا كياس نايلون تنط بوشن كل شوي و تقلب الأركيلة 😆 , “شر البلية ما يضحك” و الله ضحكت كتير ع حكياتك هههه .

    بس بيني و بينك فيه مصايف حلوة و ما وصلها الإستهتار يلي عمنشوفوا بغير مطارح
    بس يا صاحبي للي بيدفع و اللي معو عملة و راحت علينا نحنا المشحرين.
    و هلأ الناس من بعد هالظروف اللي ذكرتها إنت و من بعد هالتبادل اللي عم يصير بينا و بين تركيا عم يخلوا التصييفة في تركيا و يا قلب لا تحزن .

    على سيرة المصيف , “سلمى” قريبة من صلنفة شي بياخد العقل و من أحلى المصايف اللي رحتها , بس اتخورفنا يا عمي بأجار البيت 🙁 و ما عدنا عتبناها من يومها هههه , ما بعرف إذا وصل البل لدقنها -لسلمى 🙂 – هلأ لأنه الزيارة كانت من كذا سنة , بتمنى يكون لاء .

    تحياتي

    1. ناسداك says

      صباح النور … يا هلا

      يا سيدي انو تكون الاوساخ مجمعة بأكياس نايلون هي نص مصيبة بينما المصيبة الاكبر انو تكون مفرفدة هون وهنيك او يفكر شي فهيم يحرقها ع اساس احسن ما تكون موجودة وهي تطير الغابة فرد مرة وتصير غير موجودة بطريقها

      فعلا اللي معو ممكن يلاقي مصايف احلى لان اللي بيروحوا لهنيك نوعا ما من نفس طبقة الغنى ومابيتصرفوا متل البقية … السياحة مع تركيا كانت موجودة من زمان وصراحة انا مطلع ع الوضع هنيك وعندون حسومات كبيرة وخاصة للمجموعات وتجي باول الموسم بيكون السعر كتير رخيص وطبعا احلى عطلة … بدك جبل .. بحر … نهر .. طبيعة خضرا .. لك حتى سياحة دينية … بلد متكامل

      اى بتوقع سلمى قريبة من صلنفة … شخصيا ما رحتلها ولا رحت لصلنفة ( لانها حلب تانية ) بس كلون بنفس المنطقة تقريبا

      مية مرحبا بك هنا

  4. Moaz says

    للأسف هذا صيفنا ….

    أتمنى أن يعي البعض ما يفعلون بتلويث الطبيعة …

    شكراً ناسداك 🙂

    1. ناسداك says

      الموضوع ثقافة بالدرجة الاولى

      لما توفرت الثقافة كانت الحضارة والرقي

      مرحبا معاذ

  5. علوش says

    شوف هل الحقيقة، سياحة السوري في الأردن أرخص من سياحتو في سوريا، طبعاً الأماكن أفضل والخدمة أرقى، هلأ كمان الأردني سياحتو لسوريا أحسن بمليون وأرخص من سياحتو للأردن.

    في شي اسمو مكاتب السياحة الداخلية وهي غير موجودة أو كتير قليلة لتكون شبه معدومة، وهو سبب فشل السياحة الداخلية.

    لما بتنسق المكاتب السياحية سياحة داخلية رح يصير دفق منتظم من السياحة الوطنية ضمن أماكن محددة ومعروفة، مما بيسهل امكانية تنظيم وتنسيق الخدمات.

    بدنا شي عشرين سنة لندرك أهمية السائح السوري في بلده، رفع معدل التداول النقدي إلو فائدة كتير كتير كبيرة ولو كان ما عم يضيف شي للناتج القومي.

  6. ههههههههههههههه
    حلوة جد
    وشر البلية ما يضحك

  7. Shbbk | شبك

    اجى الصيف ورحلات الكيف…

    مصيف للسياحة والسفر يذكر زبائنه الكرام بأشهر و أرخص الرحلات الصيفية المحلية والمتوفرة للجميع – رحلة الفرنلق  ( ام الميتين ليره ) رحلة تشمل……

  8. اجى الصيف ورحلات الكيف…

    مصيف للسياحة والسفر يذكر زبائنه الكرام بأشهر و أرخص الرحلات الصيفية المحلية والمتوفرة للجميع – رحلة الفرنلق  ( ام الميتين ليره ) رحلة تشمل……

Comments are closed.

%d