البنات الفايتات بالحيط

كما وجدنا أن هناك شباب فائت بالحيط كذلك يشاركه الوجه الآخر لنفس الحيط بنات تعيش في البيئة وتتعرض للمؤثرات نفسها، وكما ان للشباب شلل وتفقيسات ومصطلحات خاصة كذلك للبنات .. وقد لا أجد مكاناً للتفصيل الكبير هنا إنما ذلك مرده لقلة المعلومات المفصوح عنها لنا .. إنما فقط نتكلم عن النماذج التي نعايشها يومياً

في الاتحاد .. قوة

كتلة واحدة لاتنفصل .. نمط من الشلل دون أعضاء جدد ولا غياب أحد .. حيث لو حصل وأن أحد العضوات لا تستطيع النزول اليوم ( خلصت الحمرة فجأة ومافي مونة ) فيتم الاتصال بجميع العضوات لإخبارهن بأن اليوم عطلة واقضوها تلفزيون وفصفصة بزر والإكتفاء بمهند او تيمو او أي قرد على احد القنوات

في كل عرس .. لها قرص

لا شك أن ساحات الكلية أصبحت مسارح وصالات أفراح والحضور باللباس الرسمي للسيدات ويسمح بإحضار الأطفال والكلاب ( للتلطيش ) .. وتكون الواجهات على آخر طرز .. مكياج كامل وتسريحة .. ربما استيقظت قبل ساعتين من موعد النزلة .

كل شي منيح .. كتر منو !

حتى لو ما كان ببلاش .. حتى لو قلم الحمرة بيكلف أكتر من صندويش الفلافل اليومي لشوفير التكسي .. لكن كتر منو .. سماكة 1 سم على الشفة غير كافي بإظهار فقاعة الأحمر .. ولا باقي الخريطة والأخضر عند الدلتا وحول مجاري الأنهار وكذلك البني للجبال والأزرق للبحار .. كل واحدة وجهها خريطة لمنطقة .. بإجتماع الشلة تحصل على خريطة العالم .. جمّع تربح !

خفة إيد

ذات مرة سأل المراقب أحد المتمكيجات بإحتراف عن الوقت التي تحرقه كل صباح مقابل المرآة .. فأجابت : ربع ساعة
فنجر المراقب عيناه : ماذا ؟! فقط ربع ساعة ! .. أقصد كل المكياج من الصفر وليس فقط الرتوش النهائية
أجابت : نعم فقط ربع ساعة .. صارت إيدي خفيفة !

شو اليوم ؟ .. كم الساعة ؟

هذا نموذج فريد من نوعه .. مضيعة الطاسة واليوم والساعة .. بتدخل القاعة الخطأ .. وعلى الموعد الغلط .. ومحاضرة مو إلها .. لا فرق بين الاثنين والخميس .. بتجي العشرة ومفكرة محاضرة التمانة .. طبعاً جاية لتشوفو ومابيهم مين المطرب وشو الفلم .. أأ قصدي الدكتور والمحاضرة .. المهم تشوفوا

بست .. بست .. يا حلو !

كما يعلم جميعنا أن التلطيش لم يعد حكراً على الذكور وطحشت الآنسات على الخط من باب حقوق المرأة وصارت تلطش وتاخد راحتها ع الآخــــر ويسترجي حدى يفتح تمو .. لا تستغرب حبيبي الشاب إن كانت عينا انثى تنوضر عليك .. هذه المرة ليست إنحراف بكرة العين .. لأنها تحوم حولك وتناقش قضاياها وتبسبس وتبصبص عليك بينما انت منهمك في تحليل مباراة البارسا مع الريال

موضة !

موضوع اللباس وتنوعاته عامل مشترك بين البنات الفايتات بالحيط وشرط اكتساب الصفة .. كل يوم تكون الموضة شكل .. وحدة سرقت مخدة البيت وعملتها شنتة .. وحدة استعارت البرداية وفصلت منها فستان مكشكش .. ووحدة اخدت اذن الماما انو تعطيها التريا مشان تضوي وتصير شمس تانية وهكذا دواليك كل وحدة بتاخد قطعة وبتركبها على حالها وبتصير موضة جديدة .. متابعين الموضة

طفوله

النموذج الطفولي لايقصد به البريء هنا .. لكن ذلك الطفولي حقاً .. أي كيس البوشار وغزل البنات .. زيارة الكافتريا عشر مرات يومياً وربما صندويشة من الماما حتى تاكلها في الباحة ..
بداخل كل مننا طفل .. لكن حتماً ليس تصرف ذاك الطفل ذو الثماني سنوات

talking talking

طالما الكلام ببلاش .. وكل شي ببلاش كتر منو .. اخدت البنات تطبق هالحكمة وترضعها للأجيال اللاحقة حتى لاتنقطع صفة الكر بطعمة وبلا طعمة .. منهن أينما كانت وبأي موضوع كان .. يجب أن تحوي كل شلة كرارة واحدة على الأقل .. تبث فيهم روح الأكشن حتى لا تصير وقفاتهم في الساحة جلسة عزاء

الشلة البيرفكت

س 1: عدد مكونات الشلة المثالية ؟ ( عشر درجات – درجتان كل تعداد )
ج1 : تتألف الشلة المثالية من :
– طفلة الشلة : وهي أكتر وحدة متعلقة بالباربي والزهري .. أقلام .. دفاتر .. شناتي .. كندرة ! .. ويساعد بعض الدباديب والأرانب
– فجعانة الشلة : أكتر وحدة بتاكل .. شنتتها نصها أكل ونصها التاني مكياج .. مصروف يومي للأكل .. حديثها متنوع جداً يمتد من الكبة وينتشر حــــتـــــى اليبرق .. اهتمامات غنية
– كرارة الشلة : حكي .. حكي حكي .. سير و سواليف .. شفتو شو لبست .. شفتو شو حكت .. شفتو شو عمل .. سمعتو .. عرفتو .. ما قلتلكم ؟ .. ولعية !
– ام خريط الشلة :وهي في منها عند الشباب كمان ( يدعى ابو خريط ) .. ام خريط ببساطة مخلوقة صادقة جداً لكنها تخرط بعض الشيء وكلامها كله معقول وأنه فعلاً هناك برأس حارتها مفاعل نووي .. وأن الخرابة التي مقابل بيتهم كانت بزمانو محيط .. وأنها شافت البحر طحينة السنة الماضية وعبت منه كاسة للذكرى .. نعم صدق صدق !
– الجمهور : عدد متمم لحجم الشلة .. مهمته هز الرأس وتصديق والتوقيع على كل ما تقوله ام خريط والكرارة وأيضاً مرافقة الفجعانة للمقصف ولا ننسى طبعاً إطراء الطفلة بأن فستانها الزهري .. بيعّقد ّ!

شقراء ولكن .. متفوقة !

كما تعلمون في الثقافة الغربية أن الشقراء تصور على أنها بلهاء ووقتها ضائع بين الشوبينغ والمراية ولا وقت لديها للدراسة والحكي الفاضي هاد .. لكن عند العرب تختلف المفاهيم كلياً فالشقراء دوماً متفوقة وعلاماتها معدل ولا تحمل ( المواد طبعاً ) إلا نادراً .
السبب واضح وذلك لكثرة العناتر المساعدين .. تدريس .. نوطات .. تنقيل .. حيالله غرض بعشرة والله يرحمك يا أبو عنتر

أول ؟! .. هجوووووووووم

هذا نموذج منتشر وبكثرة هذه الفترة ويقصد بالأول ذاك الطالب الدرويش الذي صار المركز الأول بين رفاقه على القسم ( واحيانا يقصد الثلاثة الأوائل ) ويعاني من أزمة مواصلات وإزدحام خانقة فالزميلات العزيزات يحتجن لإجابات شافية عن أسئلتهم المحيرة وماحدى غير الأول بيعرف الجواب .. وطبعاً هذا يعزز شوفة حال الأول ( إن وجدت ) والزلمة كفو جداً ..

وكما الحال عند الشباب .. النماذج كثيرة ولا يسعنا شملها كلها هنا وهذا يبقى غيضاً من فيض ، وحتى لا نتهم كالعادة بالتشاؤمية والسلبية والمابعرف شو نذكر أنموذجات رائعة بين أوساط البنات .. منهن تفوقن في الدراسة واحتلو المراتب الأولى وبشخصية قوية تفرض إحترامها على الجميع .. منهن مبدعات .. استغلوا مواهبهم وطوروها واستفادوا منها .. في الرسم مثلا فتحوا معارض وعلى مستويات مرموقة .. والتمثيل ايضاً انخرطوا في فرق مسرحية وأدوا عروض جيدة .. أيضاً في مجال العمل حيث الإناث مطلوبات أكثر لشغل وظائف السكرتاريا وخدمة الزبائن والتسويق والمبيعات

* يمنع استخدام الأسلحة المحظورة دولياً في مهاجمة الكاتب وتشمل بذلك الرمي بالأحذية ( بوش مو أحسن مني ) وكذلك الشناتي وأقلام الحمرة والمكياج وايضاً يمنع شد الشعر والعياط والتفتفة .. عدا ذلك كل شي مسموح ^_^

تدوينات متعلقة :

الشباب الفائت بالحيط

18 Comments
  1. إنسان says

    راااائعة …

    سخرية بارعة جداً ويارجل تقول عم تحكي عن كليتنا … بس مو كثير!!!!

    🙂

  2. Adnan says

    شي حلو,ولسع الحديق بطول في كتير شغلات لازم تنحكا و واقع مجتمعنا المتدهور و المتخلف بدوا تصحيح,بس شو بدك تحكي لتحكي…. .
    سلام.

  3. ranouche says

    أنا اعترض في ظلم كبير للشقراوات !
    بعدين ما عنا شقار بالبلد كتير نحنا :]

    موضوع الشلة البيرفكت أضحكني كثيراً موجود حتماً في الغرب وعنا حديثاً ظهر على الساحة : ( أنو نحنا اكتر شي هاي بالمدرسة كلون بيموتو على ما يحكو معنا !!! )

    أعتقد أن الفراغ تسلل إلى أكبر شريحة ممكنة من جيلنا الجديد بشكل خطيررررررر ومُرعب ..

    على حنب : / قلبت معدتي من صورة الأفندي فوق :_( /

  4. kenan phoenix says

    شي حلو ومتعوب عليه 🙂
    تحياتي…

  5. waseemda says

    لسه هادا اللي بنعرفوا الله اعلم شو في اشيا مابنعرفها

  6. حسام الأخرس says

    ناسدك نسيت شخصيات ( ام العريف وابو العريف) والذين يعرفون كل شيء فأي سؤال تطرحة عليهم ستجد له اجابة سريعة شافية تدوينه جميلة بس والله ما عطيتهم حقهم

  7. lamis says

    واوووووووو كتير حلوة أكيد عم تحكي عن كليتنا مافي نقاش وبوافق رنوش برأيها
    أنا كتير بحب شلة البنات بس أكيد مو شلة اللت والعجن بحب الجنان اللي بنعملوا مع بعض
    كل شي حتى التفاصيل الي بنحكي فيها كلا شغلات حلوة
    بس كتير افتقدت هالشي من أيام المدرسة
    بالجامعة مادخلت بهيك شلة بس عم فكر
    أسفة عالإطالة بس حبيت الموضوع كتيرررررررررررر

  8. ناسداك says

    شكرا لتفاعلكم هنا مجددا أعزائي ..

    رنوشة : نقلت وجهة النظر الغربية بالموضوع وكلامي يخص بعض النماذج من الشقراوات اللي بيستخدموا هاد السحر ان صح القول لأغراض متل التنقيل او المساعدة الامتحانية مثلا و بالنهاية هاد مجرد لون ما له أي تأثير على العقل والتفكير برأي …

    اما بخصوص ملاحظتك .. فالأفندي لإظهار تناسق ألوان الميك أب مو اكتر

    حسام :: عزيزي .. مهما بذلت من جهد لن أستطيع إجمال كل النماذج في مجتمعنا في تدوينة واحدة لذلك حاولت ان اتكلم عن اكثرها شيوعا وكما ذكرت هذا غيض من فيض لا ينتهي .. ما رأيك ان تشاركني وتكتب عن نماذج لم اشرح عنها هنا حتى تكتمل الفكرة أكثر ؟

    لميس :: اهلين فيكي بمدونتي 🙂

    هاد الحكي منلاقيه بكتير كليات .. مو شرط اقتصاد او اداب .. وقد نلاقي نماذج اضافية بغير كليات وقد ما نلاقي بعض هالنماذج في غيرها … من النادر جدا نحصل شلة بنات بدون اللت والعجن .. الجنان سمة مميزة للشلة وما حلو تكون الشلة كلها رسميات ومابعرف شو .. حلو كتير الواحد يكون على طبيعتو

    اهلا بك مرة اخرى

  9. mn zaman says

    صحيح … الشلل هيدي موجودة في كلياتنا وزادة بالآونة الأخيرة
    كون بعض وحط مية خط تحت بعض البنات دخلو على كتير كليات إسمة ونصيب
    فما عندهم شي غير الحكي على هاد فارق رموشو وهاد صابغ حواجبو وهاد
    حلو وهاد بشع و … و… من هالحكي اللي بلا طعمة

    البنت المو فايتة بالحيط بحيها وبقلها الله يصبرك ويحميك ويثبتك على الطريق
    ويبعتلك شي شلة تفهمك وتقدرك ربي … 🙂

    بتفق مع ranouche بقصة الفراغ … المشكلة أنو بعض .. أكرر بعض البنات
    اللي فايتين بالحيط ما عندهم هذف وهيدي مو مصيبة لأ .. هيدي كارثة

    ناسداك مدونة أكثر من جميلة .. وصفك قريب للقلب ..
    مدونة تتضحك الفم وتبكي العين .. شكراً إلك

  10. The_one says

    يعني شو بدي رد لرد . ما شا لله متعمق بس مع ذلك في مليون شغلة ناقصة ..

    نبدأ:
    كتلة وحدة

    لا تنسا انو هي التقنية تستخدم لمنع التطبيق

    يعني اذا في شي لزقة بدو يحكي مع شي بنت بتروح بتتخبا عند الشلة مشان يحل عنا .. و تستخدم مشان يحكو عشي شب هيك حلو أبوس روحو و الباكيت ما بينزل من ايدو (داخل بالحيط )

    في كل عرس .. لها قرص

    شي أكيد ولا تنسا انو كليتنا صايرة ما شا لله حديقة السبيل
    و كمان يلي بتجبي أخوها الصغير يي أبوس روحو و بتطبق فيو شباب .. ( التقنية تستخدم للشباب كمان مشان البنات ) ,,,

    كل شي منيح .. كتر منو !
    ما بدو ضيف شي بس ياريت بدهن كم درس مكياج .. صاير أنا مكياجي أحلا .. 😛

    خفة إيد

    اي أكيد

    شو اليوم ؟ .. كم الساعة ؟
    شفت بعيني محدش قلي 😀

    بست .. بست .. يا حلو !

    احم احم .. بدو أحكي ولا بلاها ..
    انت احكي للشباب .. مغامراتنا ..

    بس يا خيو شي حلو .. ما بتعذب حالك .. هنن بلطشوك
    بالاضافة للتلطيش غير المباشر .. يلي سمعتو .. شوفي هاد . حليان .. شوفي هداك ,, قال شو بدو يحكي معي ..
    وغيرو

    موضة !
    انو ما بعرف وين هدول يلي عم يصممو اللبس
    والبنات بلبسو من دون ما يقرو شو مكتوب عالكنزة ..!!!

    طفوله

    يااااااااااااااااااااااااااااااااااه

    talking talking

    انو شو بدي قلك .. يعني .. بيتنفسو من تمهن .. 😀

    الشلة البيرفكت

    في منوون كتير و متنوعات ..

    شقراء ولكن .. متفوقة !
    اي صح .. أنا معك

    أول ؟! .. هجوووووووووم

    ما هوه بصير أول مشان هيك 😀 لكا مشان الدراسة
    و بصير يلي ما بفهم بفهم ..

  11. Adham says

    هههههههههههههه , بس شغلة تلطيش البنات للشباب هي عبتني , معناتها من بكرة نازل عالسوق 🙂 …
    يسلموا عيني تدوينة رائعة جداً وممتعة . لك تحياتي 🙂 .

    أدهم

  12. Lona says

    هاد انت شب ومو عايش وسط البنات وكل هاد طلع معك
    لو كنت بنت شو كنت كتبت (الله ستر مالك بنت هههه حاج فضايح )
    وبالنسبة لاستخدام الاسلحة لاتخاف لو مالك حاطط الشباب الفائت بالحيط كان فيها وما فيها بس ما بئالنا حكي
    بكل الأحوال اللي عم تكتبو مع الأسف واقعي كتير لا وحتى يمكن الاغلبية هيك سطحيين ومافي شي يعبي الطاسة (إن شاء الله ما نكون منهم )
    سلمت يمناك

  13. ناسداك says

    ادهم .. صدق هالشي منتشر وكتير ببعض الاماكن يعني من الجامعة للسوق للشارع ..يا زلمة صرنا نخاف على حالنا تقول ماعندون اخوة شباب ^_^

    اهلا بك دوماً عزيزي

    لونا :: شايفة شايفة … لو كنت عايش ومتواصل معكم اكتر كنت عرفت المتخبي اكتر واكتر … ومشان العدل اكيد لازم نكتب عن الشباب والبنات الفائتين بالحيط ..

    بالمناسبة عم اكتب بالايدتين ع الكيبورد … بينما بالحقيقة أعسر … متل أوباما ^_^

  14. thehostage1 says

    رائعة ونقد حلو ..
    اسلوب جميل ناسدك .
    لكن النموذج السلبي حجب رؤية النموذج الآخر

  15. زينب says

    99% من البنات هيك…

  16. نور says

    عن جد تدوينة حلوة اسلوب سخري ششغغلة
    بس شو عرفك بكل امور وفعلا ماتكون عايش بين البنات يلي متلهن شو كنت كتبت الله يستر

    تحياتي

  17. Shbbk | شبك

    البنات الفايتات بالحيط…

    كما وجدنا أن هناك شباب فائت بالحيط كذلك يشاركه الوجه الآخر لنفس الحيط بنات تعيش في البيئة وتتعرض للمؤثرات نفسها، وكما ان للشباب شلل وتفقيس………

  18. البنات الفايتات بالحيط…

    كما وجدنا أن هناك شباب فائت بالحيط كذلك يشاركه الوجه الآخر لنفس الحيط بنات تعيش في البيئة وتتعرض للمؤثرات نفسها، وكما ان للشباب شلل وتفقيس………

Comments are closed.

%d