لطالما كان الفضول يدفعني لاكتشاف خفايا والغوص قليلا لعمق التجمعات الغريبة التي تحصل من نوعها بين صفوف الشباب الذين تنجمعهم صفات مشتركة ، اليوم كانت فرصة رائعة لإشباع فضولي بينما كنت أسير عائدا للمنزل رآني شخص علاقتنا لا تتعدى المرحبا بالرغم من انه يسكن معي بنفس الحي ، آه بالمناسبة إنه ينتمي لاحد التجمعات التي يشكلها شباب ضمن مناطق محددة ويمارسون تصرفات معينة فكانت ساعة حظي حينما بادر هو بالمحادثة فأحببت ان اطلع منه بشكل أوسع فدار بيننا الحوار الآتي :
هو : ( صفرة خفيفة من بعيد تشير إلى معنى تمهل ) مرحبا شلونك ؟
انا : منيح الحمد لله انت كيفك ؟
هو : ماشي الحال
انا : اى منيح طمني كيف دراستك بعتقد الشهر الجاي بيبلش امتحاناتكم كم مادة معك ؟
هو : اربع مواد
انا : آه نيالك والله قليلات … اى سيدي تعليم مفتوح مو متلنا
هو : بس والله عقدتني الانكليزي
انا : يمكن لانك طالب تجارة لهيك بتشوفها صعبة بس كلو بالدراسة بيمشي حالو
هو : اى مزبوط .. سماع شو رأيك نروح لعند بوادقجي بدي اشتري كم غرض ؟
انا : طيب مو مشكلة … امشي .. شو كنت عم تعمل بالمحل ؟
هو : والله عم بشتري بطاقة وحدات بس حاسو خورفني هلء الميتين وحدة كم سعرهم ؟
انا : والله مابعرف لانو ما اشتريتها ولا مرة بس بتوقع اقل من ميتين ليرة حتما
هو : عنجد ؟! باعني ياها بميتين ليرة
انا : اى معناها مغلي عليك كتير
هو : يا زلمة ما عم يضاينوا هالوحدات معي طاول عم فكر اقلب خطي فاتورة بركي اوفر … بس خايف اخر الشهر اتشندل بالدفع كمان يعني تطلعلي شي ست الاف ليرة وانا كل راتبي تمن تسع الاف وبشتغل من التسعة للتسعة وعلقات مع هالنسوان طول النهار ايمتى بدي ادرس مابعرف
انا : سيدي الله يكون بالعون
هو : لسا لما حبيت انخرب بيتي يا زلمة عبيت اربعمية وحدة وخلصت بفرد مكالمة لسا ما حكينا
انا : اى الموبايل للضروريات مو للاحاديث العامة والعادية
هو : اى كان عنا حديث ضروري
انا : لكن تخورف لاقلك
هو : والله لسا ما وصلت ع البيت خلصت رجعت اشتريت وخلصت كمان بعدين تكاسلت ارجع اعبي
انا : يا اخي اللي بدو يعلق بدو يتحمل كلفتها
هو : أي والله تعى ندخل لعند انس – ( أنس صاحب محل عطورات وادوات تجميل )
هو : مرحبا انوس شو اخبارك
انس : هلا بالورد
هو : بدي واكس اللي باخدوا بالعادة مع تو ون تو من ديوديران 212 men و حنجور كمان
انس : تكرم عينك
هو : هداك اليوم بعتلك واحد من طرفي من الشلة قلك مشان تعطيه من الواكس اللي بتعطيني ياه بالعادة قمت قلتلو ما عرفتني .. طالعتني بالخجلة
انس : له له .. يالله ابعتلي ياه بوكره وتكرم عينك رح اعملك سكرة
هو : طيب ماشي .. كم سعر هدول
انس : صاور ميتين تمام
هو : تفضل
انس : تسلم
وعلى باب المحل عارض اكسسوارات بناتية وفيها ربطات ايد ومن هالقصص استوقفتو واقترب لياخد نظرة اكبر
هو : شو رأيك بهي ؟
انا : صدقني مابقدر فيدك كتير بس مبين عليها بناتية شوي
هو : طيب هي منيحة .. معلم كم سعرها هي
المعلم : خمسين ليرة
هو : راعينا ولو انا زبون عند انس من تلات سنين ما باخد جيل وعطورات وبارفانات وديوديرنات غير من عندو
المعلم : صدقني راعيتك بدون ما تقلي وبالموكامبو عم تنباع بمية
هو : طيب ماشي عطيني ياها
طلعنا من المحل وكملت حديثي معه
انا : دخلك هاد الواكس شو بيفرق عن الجيل العادي
هو : اووووف شقدك متخلف يا زلمة ما جربتوا ليش
انا : معلش اخي خدني على قد علمي قلي شو فرقوا
هو : هاد مفعولو اقوى يا جدبة وبيوقف الشعر أسرع بكتير وبيطول اكتر
انا : هاااا أي معك حق هداك الجيل بيطول … دخلك هاد ما بيأذي الشعر كمان متل الجيل
هو : والله ما بعرف
انا : !!
هو : انا بعرف مزاياه بس ما بعرف مساؤو
انا : ايوااا يعني هلء توقيفة الشعر متل الألف مزايا
هو : أي لكن نحن كلنا بالشلة هيك ومنيح لحقت حالي بعلبة جديدة لانو بقيان شوي بالقديمة بيجوز ما تكفي .. عنا بوكرة مشوار ع الخط
انا : اى معك حق ما حلوة يطلعوا شعراتك مو واقفين كفاية ويتهدلو بنص المشوار بعدين بيتدايقوا منك ريري وميمي وسيسي
هو : شايف شلون
انا : طيب وان شاء الله همتك منيحة تخلص من هالمواد الاربعة وتنزل غيرهم يعني ما حلوة صرلك عم تدفع على رسوبهم كذا مرة
هو : والله ماعم بقدر ادرس شوفة عينك شغل بالمحل و مشوار الخط عم ياخدلي تلات ارباع وقتي ايمتى بدي ادرس مابعرف
هو : سماع تروح معنا على حفلة وائل
انا : مين وائل
هو : ولو .. وائل ماغيرو يازلمة مدوخ عقول البنات
انا : اى بس انا مالي بنات
هو : اى بتصير
انا : بعتذر منك والله مابقدر عندي فحص ولازم ادرس يبقى انت خبرني شو بيصير
هو : ياي مو معقول انت رح تطير على حالك كتير لانو في شلة بنات بيطيروا العقل رح يحضروها وهدول فظعوا بحفلة تامر
انا : اى تتهنوا … عنجد رح يفوتني كتير بس شو اعمل مالي نصيب احضرها بلكي ع الاعادة تاني يوم ^_^
هو : طيب انا لازم روح هلء
انا : طيب ماشي وسلملي ع الشلة كتير ها
هو : خلص وصل مان
أخيراً وبعد ما تركني استطعت ان اعرف بضعة تفاصيل والمسها بدلا مما كانت بشكل توقعات
أعتذر على الحوار الطويل والممل أحيانا لكن لتصل لهدفك عليك المسايرة احيانا ، كم أتوق ان اجتمع يوما بباقي الشلة لاعرف تفاصيل أكثر وأيضا لجماعات وشلل من نمط آخر تجمعهم قواسم غير تلك التي جمعت صاحب حوارنا اليوم فالباب لم يفتح بعد وهناك عمل كثير ينتظرني والمهمة ليست سهلة لكن لست مستعدا لان أتنكر لادخل وأعرف أكثر .
شكراً لقرائتكم :flowers:
عم دور كنت على “تعليم مفتوح” بـ وورد برس
قام جابني محرك البحث على هالتدوينة
الحلو فيها هوي : أنس ، بوادقجي، موكمبو ، تعليم مفتوح
يعني نقلتني وأنا على بعد ألف ميل إلى قلب الحدث
كنت بدي افتح جبهة معارضة على جملة : اه نيالك تعليم مفتوح مو متلنا
بس رح اتقبلها برحابة صدر ونية سليمة
إجازة سعيدة 🙂
اااااااااه شو نكشتي شغلات … طالعة مفشكلة شوي لانو نسختها نسخ من النص اللي نشرته بمنتدى كليتنا …
شايفة شو طيارتي سريعة .. ألف ميل بكبسة زر … اسرع من الخطوط السورية ^_^
عنجد نيالكم يا تعليم مفتوح ^_^ … بس نحن كمان نيالنا اكتر وخاصة قسمنا .. العلوم المالية والمصرفية …
شكراً لرحابة صدرك .. وسعة تفكيرك .. نحن وانتوا اهل .. نسكن وطن واحد
مرحبا على طول